Zyé wouvè, Jwé ka lyanné

Dépi bon détwa lanné, Jwé ka lyanné adan gwoup a nouvo jénérasyon a awtis a gwoka ki ka woulé pou fè chimen a yo é pou transmisyon a tradisyon mizikal an nou. Pou voyé travay lasa toujou pi lwen, dènyéman yo mété mizik yo fè dèwò. Non a albòm a yo sé Zyé wouvè. I fèt anlè on klé anlè kilès tini 10 mòso, pawòl a sé chanté la é on klip.

Zyé wouvè sé 10 tèks byen sizé avè kilès yo ka palé asi réyalité an nou anlè diféran ritm a gwoka : granjanbèl, toumblak, léwòz indèstwas, graj, sobo, pagyenbèl, menndé, kalagya épi woulé. É pou vwa a chantè tini : Fabien Huc ki sé kréyatè a gwoup la épi osi Ken Elin, Max Rambhojan, David Nicolo avè Yanise Torin. Avè albòm lasa, Jwé ka lyanné ka bay tann sa yo pé ofè ki adan mannyè yo ka chwazi palé dè sa ki ni an sosyété an nou, ki adan mannyè yo ka ba sé ritm la plas a yo.

Lanmou, pwoblèm a tou lé jou, dénonsiyasyon, tout ansanm avè mésaj fò é kouraj moun a tanbou toujou bay pou di sa yo ni pou di. Sé pou-tout-bon vwa a nouvo jénérasyon a awtis ki ja ni bon èspéryans é ki fè chwa touvé limyè a yo adan tradisyon la atoupannanan yo ka pòté mannèv pou kyenbé’y pou dèmen. Asiré-pa-pétèt, moun a gwoka pò’ò fin voyé mizik lasa douvan. É Jwé ka lyanné li osi désidé fè pa a’y o séryé !