Vidéyo a Medukam

Asiré-pa-pétèt, mémwa sé fondasyon. I ka pèwmèt konprann jòdi é réyalizé chimen ki fèt pou rivé la nou yé. Avè’y, moun pé vwè pli gran é rivé pli lwen. Sa, sa vré pou tout biten an sosyété, kidonk pou lang osi.

Gwadloup, tin bon enpé moun ki woulé pou lang a téritwa la pé ni plas la i ni la alè. Sé biten pou sonjé, davwa travay a sé moun lasa byen adan sa ki ka fè réyalité a Gwadloupéyen jòdi. Rèlasyon moun a lilèt lasa tini avè lang la, mannyè yo ka vwè yo menm ki ka palé’y, plas lang la tini an sosyété la sé jou la, sé konsékans a plizyè biten sé vré é adan yo fò konté travay a lésèz ki fè pou lang la. Adonk, konnèt yo é konnèt sa yo pòté fondal toubòlman. Sé on biten Medukam ka pèwmèt anlè chenn Youtube a’y avè dokimantè i ka fè anlè moun ki woulé pou lang la. Sé on travay i konmansé avè Canal 10, on télé a Gwadloup. Sé on bèl zouti pou konésans pa pèd é pou wouvè chimen pou sa ka vini.