Two présé pa’a fè jou ouvè

Asi latè tout biten ni tan. Tan li menm a’y, i anni la toupannan i ka kadansé koumansman é bout a tou sa ki tini. Sé byen pou sa, moun lontan ki té ka viv byen an konèksyon é lanati té pé di : two présé pa’a fè jou ouvè. Tann nou ka tann pawòl lasa, sa ki pé vin an lèspri an nou tou natirèlman sé solèy tin lè a’y pou i lévé, kon i tini lè a’y pou i kouché. Lè lasa ka toujou bon lè la. Solèy pé pa mal fè. I toujou an bon ritm la é ritm lasa sé ritm a lavi asi latè. Lézansyen té sav lavi tin lòlòj a’y é antoutjan sé avè’y pou viv padavwa menm si nou pa’a toujou réyalizé, nou andidan’y é avè’y réyalité an nou ka fèt.

Mé alòs ki jan pou konsidéré sa adan tou lé jou an nou ? Ès menm pawòl lasa toujou vré ban nou jòdijou ?

Kouri an nou pé pa ka chanjé kadans a lavi. Kon solèy toujou ka lévé é kouché an bon lè la, biten ka vin é fèt an vi an nou kon yo dwètèt. Nou pa ka toujou réyalizé sa, kifè nou pa toujou kontan sa nou ka trapé, é menm sa nou ja tini. Nou toujou vlé tout biten ay pli vit. Mé délè, san sav, nou pò’ò menm paré pou risivwè sa nou ka pléré ba’y la. Apoulòsdonk, sa pou byen ni an lèspri an nou sé pasé balan nou té’é pé pran, sé chimen nou ka fè andidan nou é avè nou menm ki tout. Apré, tou sa ki pou fèt ka fèt san fòsé davwa vansé nou ka fè an konsyans an nou ka fè nou rivé la nou dwèt rivé pou pé sa ni sa nou vlé la o sa nou pou ni la. Nou ka an bon moman la, avè bon lèspri la pou pé sa aprésyé valè a’y é richès i pou pòté an vi an nou.

On bon lòd ka kréyé on bon lanviwonnaj. Ayen pa’a anni mi adan on sèl jou. Adan tan, tini tan pou chak biten. Tou sa pou pèwmèt nou byen konswa, jan fò nou aksèpté dévlopé pasyans. Ni sa ka jis di i sé sajès. Mé kon tout biten, li osi ka bizwen tan a’y. Tan i ké pran pou chak moun sé ké silon plas chak moun ké ka aksèpté ba’y an kè a’y. Pa ni mont ki pé miziré sa, anni èspéryans a lavi ki pé palé la ! Pou-tout-bon, chak moun, pou chak biten ka ni tan a’y. Kidonk, chèché kon lézòt o vlé ni tou sa yo ni, pa ni sans. Konparézon, jalouzi pa’a fè dòt ki kyouyé grandè a nanm an nou. Gadé pou gadé lézòt, pisimé gadé é chèché lenpirasyon nou pé ni ki ké ban nou anvi ay pli lwen, avè konstwi sa nou ka vwè ki méyè. Rézilta nou pou trapé ké vin mizi-an-mizi. Sa ki fondal sé toujou rété adan on bon larèl. Détèwminasyon ka pèwmèt kyenn on doubout solid.  É, chèché rété adan on lèspri pozitif ka fè nou fè chak pa nou tini pou fè, yonn dèyè lòt an bon moman ki tini pou nou menm.

Vansé ka mandé gadé pli lwen. É sé byen avè lèspri, nou ka pran sans a sa ki alantou an nou. Sé li osi ki ka fè longè é lajè a sa ki pé travèsé sans a kò an nou. Ki lè nou ka échwé, ki lè nou ka réyisi, tini lison ki ka limé limyè ban nou ajékon. Tout konésans toujou ka la, sé konprinèt an nou ki ka wouvè chak lè la. Nou ka rivé alòs konnèt plis asi lègzistans é tou sa i ka ofè nou. Tou sa ka mandé aksèpté viv sa nou ni pou viv. Kidonk, dabò-pou-yonn, sé andidan an nou tout biten ka pasé, é sé la nou ka touvé klé pou konnèt dirèksyon nou ni pou pran silon la konsyans an nou ka méné nou. Avè vitès, souvantfwa sé pèd nou ka pèd an kalité a lavi é an sa i pou pòté ban nou. Nou pé éfikas, san toultan adan on kous-kouri ki pa ni bout. Viv an plen chak tan nou ni pou viv, sé ban nou chans aprann, vin méyè é fè pi byen akontinyé. Anfinaldikont, rèspèkté tan sé rèspèkté nou menm.

Pawòl sajès,

Pawòl ki richès !