Soufriyè a santiman é Réfléchi, Joël Perrot

Moun ki enmé li an lang an nou ké kontan sav Joël Perrot sòti 2 nouvo liv lanné lasa : on woman é on krèy a poézi.

Soufriyè a santiman sé on woman fiksyon ki ka gadé dèyè lavi, kon tout kras, chimen chyen, é chiraj a’y. Sa ki an fon kè pa biten ki ra, men sa ki an kabèch  two malman douvan ka anpéché on pati jenn moun fin konstri yo. Mi on véritab koutzyé asi lanmou, kidonk i ni blès a lanmou. Andingotravè sèn ki ka fè nannan a liv lasa, tibwen istwa a on bannzil démofwazé, dyalòg émosyonèl ka kenbé adiksyon a twòp enmé, a twòp jalou, a twòp lapenn. Sé rakontè la li menm ka ba pwennvi a’y tout longè a istwa la, é i pa ka oubliyé bay anlè kont a lézòt moun ki an liv la. 

Réfléchi sé on krèy poèm ki k’ay men an men épi Soufriyè A Santiman. Dayè sé entrigasyon a chak chapit a woman lasa ki bouré pwennbik a makè la pi lwen an kabèch a’y. Poèm a Réfléchi tin istil a’y, moul a’y, jé a’y, anbyans a’y an jan a’y pou larélé mo a’y ki asi lanmou, ki asi vérité a lavi, é ki asi lèdmannyè an nou…

Sé liv la an vant Gwadloup an libréri Point lire o Moul. Avè, moun pé achté yo osi asi entèwnèt anlè sit a édisyon Illémoun, anlè Amazon é lézòt gran boutik an lign.