Silans, mwen enmé’w

Byen défwa kò a’w ka tann sa zorèy a’w pa ka tann :  arété souplé, mwen ni asé, ni kouri ni las ……

Tou lé jou  sé  on  sèl  monté-désann  ki  pa  ni  fen,

É sé sèlman lè kò la pé pa ankò , i ka fè’w  sav  fò  ou  arété  jwé  èvè  santé  a’w  avan  i  two ta.

Penga  tansyon  monté, mal-do,  mal-tèt  é plis ankò ……..  Maladi pé gaté vayan.

Sé pou sa, souvantfwa  an ka fè on kanpo.

On ti maché anba-bwa pou rèspiré  lénèji   lanati  ka ban mwen,

Sizé an silans zyé fèmé é kouté lokans a ti zyozyo toupannan van la ka chanté bèl kont i jwenn pa lòt bò an sé bannzil kréyòl la.

La, an ka santi mwen byen,  flo , é an pé imajiné an ka volé kontèl sé zyozyo la pou van chayé mwen lwen lwen  adan on dòt péyi .

An moman lasa an pé vwayajé nenpòt koté si latè é fè sa mwen anvi.

Linivè sé tan mwen

Libèté total. Sa bèl toubòlman.

Pasé chak ti lilèt Lakarayib, pou di lé frè é sè on ti bonjou

Pasé Pòto-Riko é dansé on sanmba byen cho

Kouri Ayiti pou sispann lapenn é woupati

On ti lodè dous a lafimè ka ralé ‘w  si Jamayik

No woman no cry, no woman no cry…… ………

Flap …. On sèl bon, an ja rivé Kiba

Chachacha  é salsa ka vlopé mwen  adan on kalvakad  si laplas Havana.

Mèksik, Lwizyàn, Nouvèl Òwléan, Nouyòk , Kannada

Yo tout ka fè mwen koukou-dèdè.  A ! wè !!!  An kontan.

Adan on sèl voltij an pé rivé Sénégal  bo lé kouzin

Pilé dé kamannyòk a on gran-annman o Bénen é chapé pa koté Lend, Tayland, Lòstrali, Filipin….

Dòt  fwa ankò, an pé lonji si kouch an mwen é pran on tan pou médité.

Sa  osi  sé  on  dòt  zafè  ki fò é ka fè kò la byen padavwa sé on lyannaj èvè mwen  menm,

On palé an silans èvè kò an mwen ki tan mwen.

An ka imajiné chak sélil a kò an mwen dépi bout a zotèy jis chivé an mwen kon adan on mikwòskòp.

Émosyon la ka fò, sé konsidiré chak mòso a kò an mwen, chak òwgàn ka di mèsi  padavwa an ka rikonnèt yo, an ka pwan on ti moman pou sonjé yo.

Sansasyon la tèlman fò, an oblijé lésé larivyè dlo koulé.

Sé li ka chayé tout fatig, tout mové lidé, vyé zèspri, tout anmèwdasyon ki té ka kontrayé mwen.

Aprésa lè an woulévé , an frèch konsi an té dòmi pannan dé jou.

An ka santi tout vibrasyon a kò la ka vlopé mwen, 

An byen…….  Mèsi  linivè….. Mèsi lé zansèt ……

Kon yo ka di :  chak tèt , chak lèspri …..

Mé an ka konséyé  tout moun fè  èspéryans  lasa.

Kowin

Latilyé Maké ansanm, òktòb 2021