Sa ki pou’w, larivyè pa’a chayé
Mi on tipawòl moun ka itilizé onlo adan diféran sitiyasyon a lavi. Pli-souvan-ki-rarman, sé on jan pou di pa pè hak, sa lavi pou pòté ban nou nou asiré trapé’y kisiswa sa ki té’é pé rivé. Kidonk, i fèt pou fè nou sonjé fò nou toujou vansé an konfyans adan tou sa nou ka fè davwa ayen pé pa opozé nou monté an tèt a montangn nou sipozé monté.
Piplis ankò, sé byen di osi :
ni biten ki la, ki tan nou san nou menm sav mé ki la ka atann nou. Pouki ?
Asiré-sèten, sé pas chimen dèyè pò’ò mannyè douvan grandè a aprantisaj a lavi nou pou trapé. Fò ni alé, fò ni désann, fò ni touné, fò ni viré mé an-tout-jan on lè tini rivé. É mi sé la tipawòl la vlé nou mété zyé an nou. Kalanswa sa nou ka fè, rézilta nou pou trapé pou ban nou balan pou toujou ay an sans a sa nou vlé konstwi. Pé ni soufrans, mé lanbéli pa’a jan lwen. Pé ni movèzté a moun, mé i pé’é jan pé kyouyé fòs a lanmou. Pé ni dout, mé avè on bon èspirasyon biten ka woupran plas yo pou ni. Gadé pou gadé é byen gadé, konfyans la nou pou ni an lavi la, anfinaldikont sé an nou menm osi pou nou ni’y pou toujou ni fòs alé pli douvan.
Dèyè tou sa, sa fò konprann sé fò pa kité ayen vin gaté lidé an nou. Sé wouvè pou wouvè zyé asi bèlté a lavi pou maché an dirèksyon a sa ki ja la pou nou. Pou-tout-bon, tout vi an nou sé aprann nou ka aprann. É avè chak èspéryans, tini lison, tini grandi. Fò sa vwè sa pou byen konprann menm si tout biten pa’a fasil, toujou ké ni sa ki la pou nou an chak sitiyasyon nou ka viv. Sa pé on konésans, kon sa pé on rézilta. Ponmoun pé pa ayen pou chanjé sa. Apoulòsdonk, nou pa dwètèt rété maré an vyé lidé ki pé vin wondi an lèspri an nou, o an mové santiman ki vlé pran lanmen asi kè an nou, o ankò an wòl a moun ki té’é vlé vwè nou atè. Sé ouvè pou toujou gadé dé zyé an nou byen gran ouvè anlè bèlté a sa lavi ja ban nou. Kon sa, tou natirèlman, sé ba tou sa ki pou vin anplis lè pou pran plas an vi an nou. Alòs, mété lèspri an nou an sans lasa sé yonn adan pli gran kado nou pé fè nou menm.
Pawòl sajès,
Pawòl ki richès !
