Rèspèkté mwen, Boogie Flaha (feat. Icess Madjoumba)

Boogie Flaha é Icess Madjoumba, 2 mèt-a-mannyòk a kilti Matinik, sanblé pou on chanté. Tit a mizik la sé Rèspèkté mwen*. Sé on bèl lyannaj a vwa asi on son 100 % Matinik. Sé 2 awtis lasa ki ka bennyé ki an tradisyon ki an nouvo mizik a jòdi kontèl rap é dancehall mayé enfliyans a yo pou bay on son ki ka dépasé istil bèlè boum bap. Nou tini la on bèl bèlè a jòdijou. I fèt avè zouti ki tini alè mé byen chouké an tradisyon. Tanbou la sizé é avè fòs a chanté bèlè a yo, yo ka wouvè osi an dimansyon a syans a lézansyen. Avè tou sa, yo ka bay tann on mésaj fò asi réyalité a sosyété an monn la nou ka viv la. Kon yo chak abityé, yo ka voyé lavwa pou di sa ki pou yo mérité tann pou voyé konsyans monté.

Pasé mizik, nou tini la on kréyasyon ki ka fè réyalizé jan sa nou ka kriyé tradisyon pa dòt ki nou. É an tout tan, nou pé konstwi avè sa ka fè nou. Pa ni limit pou sa. Sé wouvè lèspri anlè tou sa lavi ka bay. Sé sa Boogie Flaha é Icess Madjoumba, kon enpé dòt awtis dayè-pou-yonn, désidé fè pou vansé avè sa ka fè nou.

Ni on pawòl ka di : kouté pou tann, tann pou konprann ! Alòs ann pran tan dékouvè vidéyo a chanté lasa pou pran sans a tou sa.

Dékouvè plis anlè Boogie Flaha avè : https://www.sayanns.com/boogie-flaha-le-hip-hop-e-bele-ka-maye/