On parle là où ça fait mal !

Sé dènyé tan la, podcast ann pran douvan. Ka sa yé ? Ébé ! Sé on émisyon ki fèt pou kouté ki anlè entèwnèt. Alè, pé ni anrèjistrèman vidéyo la ki fèt osi. Pli-souvan-ki-rarman, sa ka yonn o plizyè moun ka palé anlè on sijé.

Myriam Guéril, on fanm Gwadloup ki fòwmé’y Kanada désidé ni tibwen plis ki on lanné fè podcast a’y. Non la i ba’y la sé On parle là où ça fait mal. Adan’y, i ka palé anlè sijé moun pa’a toujou mèt douvan adan sosyété an nou mé ki pòtalan toubòlman. Kidonk, i désidé wouvè pòt pou pèwmèt lésèz pawòl a yo toufé an lavi tou lé jou di sa yo ka viv.  Asiré-pa-pétèt, sé on bèl gwo travay i ka fè la !

Adan On parle là où ça fait mal, nou tini témwanyaj a moun ki ka nòz di réyalité a yo. Nou pé vwè sé vré sé onlo moun ki viv o ka viv on soufrans. Kifè, avè podcast lasa, Myriam Guéril kréyé on zouti avè kilès moun pé di vérité a yo é sa ka kouté pé aprann. Sé on biten i ka fè avè anpil séryé é nou pé byen vwè dèyè sa sé pa a’y i ka fè pou bon pou géri blès a sosyété an nou é pèwmèt i vansé.

Pou kouté On parle là où ça fait mal, sa fasil ! I asi sé platfòwm a podcast la é osi asi YouTube. Pou pé sa suiv sa Myriam Guéril ka fè, sa posib anlè Tik Tok é anlè Instagram.

Nou pé enki swété pli an pli moun ké pran tan kouté pawòl moun ka nòz di pou palé dè sa yo ka viv é pèwmèt alòs on pli bèl, on pli gran, on pli bon lawmoni an kè é ant moun.