Nyouz a sèptanm 2024
Byen bonjou,
Nou an sèptanm é pou onlo sé tan a larantré. Tout biten ka woupati adan on balan é tout moun ka pòté mannèv. Mé, ant lékòl a timoun, travay é tou sa ki ni, fò pé véyatif pou pa pèd nou. Pou vré, adan tou sa, fò pa nou obliyé sa ki pòtalan pou nou é ka fè nou santi nou byen. Fò nou sonjé nou menm é sa pran moman pou nou. Sé tou sa ka fè kalité a vi nou pé ni.
Ki adan aktivité nou ké chèché tini, konésans nou ké prévwa trapé, lè nou pé rivé a pran pou pozé, nou ka konstwi réyalité an nou. Fò pé réyalizé sa, pou pa anni rété ka atann lavi fèt é pa janmé vwè ayen nou té’é vlé rivé. Nou ni pou fè pou nou pou pèwmèt sa nou vlé vwè jou.
Chak maten, solèy ka lévé é nou, nou pé désidé la nou vlé ay, sa nou vlé fè. Dayè-pou-yonn, mwa lasa entérésan davwa i adan mwa a lanné la ki ka envité pansé woukomansman. Nou pé konsidéré alòs sé on bon lè pou wouvwè sa nou vlé fè.
Moun, kisiswa laj a yo, bizwen viv aktivité adan kilès yo ké byen. Sa pé fè ispò, ay pli pré lanati, jwé mizik, li, maké, aprann on nouvo lang, fè kanbiz, pran foto kon enpé enpé dòt biten. Asiré-pa-pétèt, solisyon dèyè pò’ò mannyé !
Pou sa, dépi 3 lanné, nou ka chèché fè pa an nou pou pèwmèt moun ka suiv nou vansé avè lang an nou. Nou kréyé latilyé pou maké an lign é moun ki enmé jwé épi mo pé jwenn nou pou dévlopé piplis konpétans lasa. Jis lanné pasé, nou té ka fè Latilyé maké ansanm. Alè, an 2024, parapòt a sa moun mandé nou, nou k’ay pli lwen. Nou konswa 2 nouvo latilyé : yonn pou moun ki vlé maké prèmyé tèks a yo é lòt la pou moun ki ja ka fè’y é ki vlé vansé ankò plis avè lang la.
Alòs, si ou enmé maké é vlé sav plis anlè sé 2 nouvo latilyé lasa, ay anlè : https://www.sayanns.com/latilye/ Ou ké trapé la tout enfòwmasyon ou bizwen. É si sa ka di’w, monchè ann jwenn nou ! Ou sèten tini la nannan pou fè douvan avè lang an nou.
Anni sonjé, pèwmèt vou fè biten ou enmé, sé sa ka mété bèlté adan vi a’w.
Gadé vidéyo la : Nyouz a sèptanm 2024
