Nyouz a òktòb 2023
Byen bonjou,
Nou an òktòb, on mwa pannan kilès nou ka fété lang an nou. Onlo pa’a dakò nou kriyé lang la « kréyòl ». Ès yo ni tò ? Nou pé pa di sa ! Mé pannan tan lasa, moun an nou menm chwazi konsidéré pou nou fété lang an nou é pèwmèt popilasyon an nou réyalizé valè a’y, ès sé sa ki pli pòtalan ?
Kisiswa mannyè nou vlé kriyé lang la, sé tan nou. É menm plis ki sa, sé on pa a Nou menm. Pasé tout dòt biten, viv li an plen sé sa ka konté. Téori si téori bwodé kon pa ni pé ké ouvè pòt ban nou. Sé aksyon an nou chak pou viv byen é lang an nou ké pèwmèt nou vansé.
Toujou ké ni diférans ant lidé èspésyalis ka mété dèwò. Sa ka fè lasyans. Mé an réyalité, tou sa pa ka opozé rèspé. Alòs, annou kontan sa nou tini é chèché méné’y toujou pli ho ! Mi sé sa ki fo ! Konprann pwa a lang la é fè i pézé ankò plis tout tan nou pé.
Nou chak adan sa nou sa fè, adan rèlasyon nou tini ki avè Nou menm ki avè lézòt, adan mannyè nou ka bokanté pawòl, nou pé woulé an sans lasa. Lang sé richès é tout lang sé lang !
Ba lang an nou plas a’y, sé aksèpté ban nou plas nou pou tini. Jan nou ka fè avè’y lyanné avè konsidérasyon nou tini pou Nou menm. Fè pou lang la, sé fè pou Nou. É Nou lasa sé moun, sé pèp, sé limanité.
Lang sé trézò pou sa pòté anlè. Yo pa fèt pou séré. Okontrè, yo la pou pèwmèt nou di sa ki andidan an nou. Pou-lòs-donk, kisiswa lidé nou pé ni, annou sonjé sa byen byen fò é omwens pannan mwa òktòb, annou pran tan grandi ankò plis avè éritaj lasa pou vwè pli lwen é avè’y, rivé toujou pli ho.
An vérité enmé Nou, mi sé sa ki tout !
Gadé vidéyo la : Nyouz a òktòb 2023
