Nyouz a òktòb 2022
Byen bonjou,
Nou an mwa òktòb é kon zòt sav sé on mwa pannan kilès nou ka pran tan sélébré lang an nou.
Apré Dominik, adan sé lanné 1980 la, dòt téritwa, adan Lézamérik kon adan Loséyan Endyen désidé pran 28 òktòb pou jouné entènasyonal a kréyòl.
Avè tan, silon koté la sé simenn, kenzenn é menm tout mwa la moun pran tan labitid fété an péyi ola yo ka palé lang la mé osi koté ola tini dyaspora a sé péyi lasa.
Lang sé on mòsò a nou menm kivédi fété lang la sé fété nou menm. Adonk 28 òktòb sé on dat pòtalan toubòlman davwa sé on tan nou ka pran pou viv an plen sa nou yé.
Parapòt a istwa a pèp an nou é piplis ankò a réyalité a jòdi, té fo nou ni on moman kon tala an lanné la pou woupran sans é konsyans a sa nou tini é menm pran fòs pou kontinyé doubout é pèwmèt transmisyon pou jénérasyon ka vin dèyè.
Sé osi on moman nou tini pou lang an nou pran plas i po ko ni an sosyété an nou é voyé litérati é tout dòt kréyasyon ki fèt avè’y monté.
Sé pou tou sa, nou touvé nou ka pran plis jou pou fèt lasa.
Fèt a lang an nou sé on bèl ègzanp a biten nou kréyé pou nou menm pou pèwmèt sosyété an nou vansé.
Ba lang an nou plas i mérité fondal ! Anni sonjé, lang an nou sé on mòso a nou menm !
Osi, fèt lasa, sé on bèl modèl moun pé pran pou jòdi kontinyé kréyé biten pou pèwmèt pèp an nou ay pli lwen. Nou pé enni èspéré sé on mésaj lajénès ké tann.
Gadé vidéyo la : Nyouz a òktòb 2022
