Nyouz a novanm 2022
Byen bonjou,
An mwa novanm lasa, nou kay palé zòt asi pòtalans a lang maké.
Lang dabò-pou-yonn sé palé yo ka palé yo. Tini pasé 6 000 lang asi latè é majorité adan yo ka ègzisté yenki kon sa : moun adan tou lé jou a yo ka itilizé yo pou bokanté pawòl. Mé osi, dépi nonm asi latè tini diféran tras a ékriti ki lwen adan listwa a limanité. Dépi an tan lantikité, té ja ni pèp ki tini sistèm a maké a yo byen sizé.
Adan modèl a sosyété la nou adan’y la, enpé biten òwganizé alantou a ékriti. Ou pé pa bat kat a’w byen si ou pa konnèt ni li ni ékri p’on lang, èspésyalman tala o séla léta chwazi mété douvan an sistèm a’y. Mi pwoblèm la pou nou ! Ki plas lang an nou ni an pwòp téritwa la ola i vwè jou la ? Si nou ka konsidéré lang sé on pati a nou menm, nou pé mandé nou ki plas pouvwa la ki ni la ka konswa nou pé ni an pwòp téritwa an nou, é menm asi latè. Nou ké lésé chak moun pran tan kalkilé anlè sé biten lasa.
Sa nou, nou ké konsidéré sé ki plas nou menm ka santi nou pé ni an sosyété an nou é osi adan monn la nou adan’y la. Lasyans ja byen montré grandi avè plizyè lang sé on richès ki sé lè yo ka konsidéré mannyè sèwvo ka maché, dévlòpman a konpétans, kapasité a analiz, aprantisaj a nouvo lang, é onlo dòt biten ankò. Parapòt a sa, woulé pou lang an nou fondal. Aprann li é maké lang lasa nésésè.
Nou pa ni p’on rézon konsidéré nou pa ayen é nou pé pa vansé avè sa ki ka fè nou. Sé enpozé on soufrans initil ki pé pa pèwmèt nou doubout solid anlè 2 pyé an nou. Malérèzman, réyalité a monn la nou adan’y la ka fè ni enpé ki chouké adan mannyè vwè lasa. Mé, annou mandé nou ès sé la nou vlé rété ? Ès nou pa’a kwè nou pé rivé pi lwen ?
Ka nou pou fè ? Pa konprann kon enpé ka di sé yenki sibi pou sibi. Awa ! Chak moun pé si yo désidé ! É la, ka nou pé ? Nou pé désidé fè chwa aprann maké lang an nou, achté liv an lang an nou é pran tan li yo. Sé 2 ti biten ki pé fè on gran gran gran gran gran diférans pou nou menm.
Liv sé nouriti a lèspri. Sé on envèstisman pou nou menm pou nou vwè pli lwen é viv pi byen an monn la nou adan’y la. Alòs, annou pran tan li ! É piplis ankò, annou pran tan li lang an nou !
Gadé vidéyo la : Nyouz a novanm 2022
