Nyouz a mé 2023

Byen bonjou,

Nou an mé é kon nou tout sav, mwa lasa pòtalan toubòlman lè nou ka konsidéré listwa a pèp an nou.

Mé, sé tan pou sonjé é fété LIBÈTÉ. Nou ni moman lasa chak lanné pou pèwmèt nou vwè pli klè é ay toujou pli lwen davwa anfinaldikont sé byen pran sans a tout valè a lavi ki ni la.

Moun sé moun ! Sa sé on lwa menm a lavi. Diféran modèl a rézistans ki té toujou la dépi an moman nonm, fanm, timoun touvé yo avè chenn ka maré kò a yo é pannan tout tan a bitasyon, kilti an nou, lang an nou, pwòp ègzistans an nou menm la pou pèwmèt nou réyalizé valè a gran prensip lasa. Nou tini chak lanné pou désidé jan nou ka fè douvan ankò ankò é ankò avè’y.

Listwa a pèp an nou rèd mé fòs é valè a sa Zansèt an nou rivé kréyé an sitiyasyon nou pé pa menm rivé imajiné, pou pèwmèt nou doubout é sav kilikiswa la nou pé yé o sa nou pé ka viv, pa ni ayen nou pé’é pé dépasé. Nou chak tini andidan nou sa ki fo pou kréyé é ay toujou pli lwen.

Nou pé désidé fè limitasyon payé. Nou pé chwazi kréyé avè sa nou ka kwè ki méyè pou nou menm an monn la nou adan’y la. Sé sa Kassav’ fè lè yo désidé kréyé on mizik pou pòté kilti an nou é lang an nou, kidonk éritaj Zansèt lésé ban nou, lentènasyonal. Nou ni la on ègzanp a moun ki désidé sanblé é avè sa ki ka fè fòs a yo fè pou pé sa vansé. É travay a yo pèwmèt moun é menm pèp fè douvan.

Nou chak, la nou yé, avè sa nou sa fè, nou pé nou osi désidé aji pou pèwmèt limanité grandi. Sonjé fondal pou pèwmèt nou pran konsyans a sa nou pé fè. Fété la pou ban nou balan an sans lasa. Alòs, éritaj Zansèt lésé ban nou, ka nou ka désidé fè avè’y ? Mi sé kèsyon lasa chak lanné, chak moun a sosyété an nou pou konsidéré. É éritaj lasa sé kilti, sé lang é sé konsyans a nou menm.

Sé pasé nou ka pasé asi latè. É pannan pasaj lasa, chak moun pé kréyé sa i ka konswa ki pli bèl. Chak moun pé konstwi. An lonnè a Zansèt an nou, annou toujou gadé sa byen fò an lèspri an nou é aksèpté i kléré chimen an nou !

Gadé vidéyo la : Nyouz a mwa mé 2023