Nyouz a maws 2023

Byen bonjou,

Kon nou tout sav, lavi ka woulé woulé a’y, jou ka suiv jou é jou ka fè mwa. Mi nou ka rantré an maws ! Nou asi twazyè mwa a 2023.

An koumansman a lanné, onlo adan nou ka konsidéré fè bon enpé biten pou chanjman pran plas an vi a yo. Souvantfwa, a lè kon sa, enpé enpé ja moli é woupran mès yo té vlé pèd. Délè, yo pa menm ka réyalizé yo ka fè dèyè anlè sa yo té prévwa, mé sé byen sa ki ka rivé yo. Alòs nou pé mandé nou : ka ki té’é pé rédé moun pou yo pa touvé yo chak lanné an menm sitiyasyon la ?

Sonjé « pouki » sé pétèt la sigré la yé. Fè sé yonn, mé « pouki » an nou mi sé’y ki tout. Sé li ka fè rèv viv an kè an nou é ban nou fòs fè yo vin réyalité an monn la nou adan’y la. « Pouki » ka bay sans é kouraj dépasé tout bayè ki pé ni an chimen. Sé’y ka fè dèyè moman féblès sé toujou doubout ka méné ! Anni gadé listwa é konsidéré travay a gran fanm é nonm latè ja pòté.

Sé on « pouki » fò ki fè an 1957, on gwoup a nonm é fanm Gwadloup désidé kréyé l’ACRA (l’académie créole des Antilles) pou voyé lang a yo douvan. Sé on « pouki » fò ki fè an 1959 Gérard Lauriette, yo té ka kriyé osi Papa Yaya, ki té on mèt-lékòl Gwadloup désidé kréyé pwòp lékòl a’y avè on métòd a travay ki ta’y pou rédé jénès Gwadloup réyisi. Sé osi on « pouki » fò ki fè Dany Bèbel-Gisler, on sosyolengwis Gwadloup, woulé pou défans a lang an nou é an 1979 kréyé lékòl Bwadoubout pou li osi rédé jénès a lilèt a’y é sèvi avè zouti a lasyans pou kabéché anlè on modèl a ansègnman ki ka konsidéré lang é kilti a sé jenn la pou pèwmèt yo aprann pi byen. Sé toujou on « pouki » fò ki fè Jean Bernabé, on lengwis Matinik, kréyé an 1975 G.E.R.E.C on gwoup pou wouchach syantifik dévlopé asi lang é kilti a téritwa an nou, an téritwa an nou é an 1994 fè pou konmansé tin étid é diplòm a lang la linivèsité. Nou té’é pé kontinyé ankò ankò ankò ankò é ankò avè kantité lègzanp listwa pòté.

Sa fò nou réyalizé sé sé konsyans kon tala ki ka fè limanité vansé. É nou pé sèvi avè’y, fè’y vin tan nou adan tou lé jou an nou, pou kréyé sa nou té’é vlé an vi an nou. Désidé chouké an lojik lasa, sé désidé fè chwa kréyé sa nou ka vwè ki pli bèl é pli gran pou nou menm pou toujou fè douvan. Menm jan tin solèy é lalin, tan é sézon pou kadansé lavi é mété lawmoni an lanati, nou pé konsidéré aprann avè sa yè pòté pou fè jòdi an nou. Annou sonjé sa ! Annou enmé nou !

Gadé vidéyo la : Nyouz a maws 2023