Nyouz a jen 2024
Byen bonjou,
Dépi mwa avril pasé, Matinik, dépawtèman Lettres et sciences humaines a linivèsité la pran pou non Faculté Jean bernabé – UFR lettres, langues, arts et sciences humaines.
Jean Bernabé té on pofésè agréjé a gramè é on lengwis adonk i té ka fè wouchach syantifik asi lang é i té chwazi èspésyalizé tout travay a’y asi étid a kréyòl. Nonm Matinik lasa pa té ni on mannyè vwè fèmé lè i té ka konsidéré lang la, okontrè pou’y fò té ni zyé ouvè asi chak téritwa ola yo ka palé’y é fè on travay pou i kyenbé plas i pou ni chak sé koté lasa.
Misyé Bernabé mèt dèwò enpé maké syantifik asi lang la. Kidonk, i adan moun a téritwa an nou ki ba’y on bèl balan é pèwmèt li dépasé palé a tou lé jou pou rantré an karé a kalkil a moun ka dévlopé konésans. Dayè-pou-yonn, sé’y ki té woulé pou kréyasyon a GEREC, ki té on gwoup a wouchach asi lang é kilti a téritwa an nou ki té Matinik, Gwadloup épi Guiyàn. Avè rézilta a wouchach a’y, i adan moun ki pozé karésòl pou pèwmèt konprann mékannik a lang la. Piplis ankò, sé li ki fè tini étid é diplòm a lang la linivèsité Lézantiy. I adan moun ki pòté mannèv osi pou tini kréyasyon a konkou pou ni pofésè a kréyòl adan lékòl an Frans. Sé kon sa nou touvé nou tini kapès é èspésyalizasyon pou mèt-lékòl, é aprésa on agrégasyon vwè jou. Pawòl dèyè pò’ò mannyé si sé pou palé anlè tou sa i fè ! Sa nou ké di ki entérésan toubòlman adan, sé vwè jan i rivé woulé pou vansé a lasyans é an menm balan la fè pou vansé a lang la adan sosyété an nou.
Nou ka kwè nou pé alèz pou di é répété pasé kouri dèyè rèkonésans oliwon latè, Jean Bernabé adan èspésyalis ki fè chwa woulé dabò-pou-yonn pou vansé a popilasyon an nou. Natirèlman, moun pé dakò o pa dakò avè pozisyon i té ni. Mé nou pa’a kwè moun séryé pé pèwmèt yo pa konsidéré sa i fè. Asiré, si lang la jòdi ni plas la i ni la an sosyété ola yo ka palé’y sé parapòt a konba a moun kon misyé Jean Bernabé. Apoulòsdonk, sé lontan plis ki on bèl lonnè linivèsité ba misyé Bernabé. An réyalité, sé on bèl kado yo fè jénès a téritwa an nou ki pé ni la on référans an plis pou pèwmèt yo toujou kyenbé fò an lèspri a yo : yo osi yo pé ay lwen é woulé pou chanjman pozitif an sosyété an nou.
Sa nou pé èspéré dèyè sa sé chak koté, chak lari, chak ti karé, chak èspas, chak ti lankonnyi a téritwa an nou pé batizé enki avè non a moun ki fè on travay pozitif pou vansé a limanité. Fè sa sé pèwmèt jénérasyon ka vini grandi avè modèl ki ka pèwmèt yo konstwi yo pozitivman é vwè lwen. Vansé a pèp lyanné lyanné avè zafè lasa. Annou byen réyalizé sa !
Gadé vidéyo la : Nyouz a jen 2024
Dékouvè plis anlè misyé Jean Bernabé avè awtik lasa : Gerry L’Étang présente la trajectoire de Jean Bernabé
