Nyouz a jen 2023
Byen bonjou,
Nou an sizyèm mwa a 2023. É wi ! Nou an mitan a lanné la !
Ki jan prèmyé mwatyé a lanné la té yé ? Si té fo chak moun bay on répons pou kèsyon lasa, natirèlman pou yo chak i té ké diféran. Pouki ? Davwa chak moun asi latè ka kréyé réyalité a’y. Sé aksyon a chak jou ka fè jan vi a on moun yé. É, sé mannyè vwè ka fè moun ka désidé aji on jan parapòt a on lòt. Adonk, sé lidé ki ka méné adan kabèch ka ba vi a chak moun on dirèksyon é chimen dèyè pò’ò mannyé !
Alòs, kisiswa jan biten té yé jis alè, chak moun pé désidé sizé pou kalkilé ka i té ké vlé pou apré kréyé sa i vlé pou’y. Nou ni on bèl ègzanp ka pèwmèt konprann sa byen byen byen, lè nou ka konsidéré travay a misyé Likibè Séjò. Gran Nonm Gwadloup lasa adan moun ki ja byen woulé pou défans a lang an nou avè dis, liv, émisyon, animasyon é èspèktak i ja fè, mé osi i toujou woulé pou fè konsyans vansé adan tou sa i kréyé. Kifè, Likibè Séjò adan moun ki rivé pòté lidé é pawòl ki jòdijou chouké adan mannyè konswa lègzistans a moun Gwadloup, é menm palé ba bon détwa moun a plizyè dòt téritwa kontèl Matinik o Laréinyon.
Lè Likibè Séjò ka palé dè vi a’y, i toujou ka èspliké i viv plizyè tan. Yonn adan kilès i té adan « les -ismes ». Mé aprésa, limyè kléré ba’y lè i dékouvè liv Anti-matière et éternité a Bhaktivedanta Swami Prabhupada. Syans ki té adan touvé’y on bon nouriti pou lèspri a’y. Avè’y, i fè douvan é réyalizé lontan plis valè a tanbou, fòs a lang épi pòtalans a ispiritiyalité. Pou-tout-bon, travay a’y ka pèwmèt vwè jan anba rézilta a aksyon sé larèl moun ka suiv ki séré é ki la ka pèwmèt fè chwa.
Nou, la, la nou yé la, ka nou vlé ? É ka nou ka pran pou vérité pou pèwmèt nou kréyé sa nou vlé ? Mi la 2 kèsyon chak moun pé konsidéré pou désidé sa i ka chwazi kréyé. Sa vré pou li, kon sa vré pou sosyété la adan kilès i ka viv la é pou lèmonn, davwa an réyalité sosyété épi limanité pa dòt ki moun é moun é moun. Sé aksyon é travay a chak moun chak jou ka fè réyalité a lavi. Kidonk, chak lè nou ka fè pou nou, sé osi pou pèp an nou é pou limanité nou ka fè’y. Lidé nou ka chwazi suiv ka fè kalité a sa nou pé konswa é bay lavi. Si kon yo ka di kilti an nou gran pasé nou, sa ka byen sanm sa lidé an nou pi gran ankò. Annou anni sonjé sa fò é aksèpté fasadé avè nou menm pou kréyé réyalité ki ka bèl !
Gadé vidéyo la : Nyouz a mwa jen 2023
