Nyouz a janvyé 2025

Byen bonjou,

2025 ja byen pran balan é nou kontan la épi zòt ankò pou ba zòt bon nyouz.

Koumansman a lanné sé toujou on tan pou konsidéré sa nou té’é vlé diféran. Pasé konsidéré, sa ki pé pèwmèt rivé pou bon, sé vwè sa nou té’é pé fè pou sa nou vlé vin on réyalité ki tout.

Asiré-pa-pétèt, konswa an kabèch sé yonn, sé aksyon ka pitité ! Pou ni rézilta, fò fè é pou ni kalité, fò pé fè avè kè. Mi sé kon sa rèv ka dépasé imajinasyon é viv an monn la nou yé la. Sé avè aksyon a moun ki kapab an lojik kon tala limanité ka vansé. Anni sonjé tout biten ka fèt dabò-pou-yonn an lèspri pou apré vin vré.

Nou tout gran ! Nou tout ni gran lidé ! Nou tout pé désidé woulé pou sé lidé lasa vwè jou. Sa nou ka èspéré sé pi an pi moun ké dévlopé konsyans lasa an téritwa an nou pou sosyété an nou vansé toujou plis é pou nou fè pa an nou pou limanité fè douvan. Sé wòl a tout pèp, kidonk a chak moun asi latè réyalizé sa i pé fè ki pozitif la i yé avè sa i ni. Sé sa ka fè moun fè douvan, sé sa ka fè kilti fè douvan, sé sa ka fè sosyété fè douvan, sé sa ka fè limanité fè douvan.

Dèyè on pawòl kon tala, nou oblijé ni on pansé pou Gérard Colbac. I té on labé révolisyonè Gwadloup ki té ka défann rèspé a kilti, rèspé a listwa, rèspé a éritaj a Nèg asi latè é a lang an nou. Dayè-pou-yonn, i jis té kréyé on lalfabé a lang la ki té fèt avè dòt lèt ki lèt a lafabé laten. A pa sistèm a maké lasa moun chwazi anfinaldikont, mé sav on travay kon tala fèt épi ni konsidérasyon pou’y, pòtalan toubòlman !

Aksyon a chak moun asi latè ni on sans. Kon yo toujou di nou : sé grenn diri ka plen sak diri. Gérard Colbac adan moun Gwadloup ki avè travay a yo kléré konsyans a enpé. Menm si sa pa’a parèt majorité tan, aksyon kon pawòl, é menm lidé, ka ni rézonans. Sé sa ki ka fè, vansé a yonn kisiswa la i yé toujou fondal pou limanité. Avè moun ka fè douvan, monn an nou ka méyè. Nou pé enni èspéré toujou plis moun ké pran sans a tou sa é désidé viv vérité a yo.

Gadé vidéyo la : Nyouz a janvyé 2025