Nyouz a désanm 2023

Byen bonjou,

Nou an fen a lanné 2023 é enpé ja ka pòté mannèv pou fèt ki ka vin. Yo ja ka paré ola yo ké yé é jan yo ké chomé. Ni ki ja ka kouri gannyé kado an magazen. Lè, séla ki pa’a èspésyalman pran bòdé pou yo pannan tan lasa, la ka gadé’y pwoché san mansousyé. Dòt aprézan présé vwè’y rivé pou viv sa ki ké ni apré. É lésèz ki ka woulé pou kannaval, ja ni on pyé an 2024 avè préparasyon é répétisyon.

Asiré-pa-pétèt, chak moun ka viv moman a lanné lasa silon mannyè vwè a’y é sa i ka konswa ki méyè pou’y. Anfinaldikont, chak moun a ka chwazi mannyè i vlé viv li. É sa, sa ka vré pou tout biten moun ka viv. Pa ka ni yonn ni dé mannyè sèlman konsidéré sa ki ni. Chak tèt, chak lèspri !

Souvantfwa, nou ni santiman sé sa ki alantou an nou, sa moun ka fè o di ki ka kréyé sò. Olagya ! Si byen ni lidé fò nou kité van chayé pou-tout-bon, asiré tala adan. Kalité a vi an nou é jan nou ka alèz an tou lé jou an nou sizé adan sa nou ka désidé kréyé pou nou menm. Kidonk, sa nou ka konswa ki méyè pou nou sé poto ka kléré vi an nou.

Alòs, aksèpté vwè sa 2023 té yé ki avè sa ki té bon é sa ki pa té bon adan, pou pé woutyenn lison é lison ki té an mitan tou sa, sé solisyon pou vansé. Avè sa, lagé on bèl gran mèsi avè kè davwa kisiswa sa ki pasé an lanné la, nou rivé jis la é nou pé désidé ay ankò pli lwen. Pasé tout dòt biten, fen a lanné ka osi, on bèl bèl lè pou pran on kanpo adoumanman é wouvè zyé anlè moun la nou vin la. Nou pa jòdi, moun nou té yé mwa é mwa douvan. É sé èspéryans nou chak ka viv ka pèwmèt évolisyon lasa. Aksèpté vwè’y sé ban nou chans konprann nou plis, épi vwè sa nou vlé pou nou menm an nouvo lanné la. Kon misyé Likibè Séjor toujou ka di : « chak biten ka vin biten parapòt a on biten ». Sé lidé nou ké désidé kyenbé ké fè nou ké pé mété on pyé yonn dèyè lòt pou rivé konstwi réyalité nou vlé. Annou sonjé sa pou toujou vwè douvan an nou.

Gadé vidéyo la :  Nyouz a désanm 2023