Nyouz a désanm 2022
Byen bonjou,
Nou an désanm é kon nou tout sav pou enpé enpé adan nou, fen a mwa lasa sé on tan a fèt.
Sé on tan pannan kilès moun ka sanblé, ri é manjé ansanm, épi osi bay kado.
Nou té’é pé la mandé nou ki kado nou, pèp, nou té’é pé fè nou menm é fè limanité pou nou pé sa ay toujou pli lwen, toujou pli douvan.
Biten fondal asiré nou té’é pé fè an sans lasa sé chèché konnèt NOU toujou plis pou pé viv pi byen an monn la nou adan’y la. Mé ka sa vé di ?
Konprann pi byen sa ki ka fè nou, moun, é konprann pi byen sa ki ka fè nou, pèp ! Adan zouti nou tini pou wouvè konprinèt an nou asi mistè a lavi, nou tini lang. Yo ka pèwmèt nou di sa ki ni, sa nou pé vwè o santi an tou lé jou an nou é tini séré adan yo mannyè konswa lègzistans.
Adan tout kado nou ké pé fè lanné lasa é lanné ka vini apré, annou sonjé nou ! Annou sonjé sa ki ka fè nou ! Annou réyalizé chak pèp, chak lang, chak kilti ka fè bèlté a limanité ! Annou pran konsyans a valè a sa nou ni ! Annou kyenbé sa nou ni pou ay pli lwen épi’y ! Annou konsidéré pa anni gonflé pòch a lézòt é envèsti an sa nou tini !
Désidé pli pré lang an nou, sé désidé pli pré kilti an nou, viv an awmoni avè sa ki ni é wouvè lèspri an nou pou konprann lézòt pi byen. Pou-tout-bon, sé yonn adan pi bon kado nou pé fè nou menm é fè limanité. Annou gadé sa an lèspri an nou é fè’y vin réyalité an nou !
Sé té ‘Mwen menm mwen menm an mwen’ pou nyouz a mwa lasa avè Sayanns.
Tout moun ki ka fété : Bon fèt !
Gadé vidéyo la : Nyouz a désanm 2022
