Nyouz a avril 2025
Byen bonjou,
Adan gran nouvèl nou trapé sé dènyé tan la, tini rivé an sal a siléma a fim FANON a réyalizatè Jean-Claude Barny. Ja ni bon détwa jou i dèwò é sé avè anpil plézi nou dékouvè nouvèl lasa. Menm jan, nou kontan tann moun ka kouri ay vwè’y é ka kouri achté liv a Fanon. Konnèt lidé a gran pansè fondal é sa ka byen sanm sa tin la on mouvman ka fè konnèt piplis ta Frantz Fanon.
Dayè-pou-yonn, fim la anlè travay é vi a gran nonm lasa, kidonk i ja ka wouvè anlè lidé i dévlopé asi konsékans a kolonizasyon asi pèp. É sé lidé ki ka pézé jis jòdi. Onlo toujou konsidéré sikyat Matinik lasa té on révolisyonnè. Lè an réyalité, i pa té dòt ki on moun ka défann lavi é rèspé a moun. Sé aksèptasyon a oprésyon, dominasyon, politik a démounaj ki fè é ka kontinyé fè, enpé ka di i té radikal.
Kon li menm di : an tout jan, chak jénérasyon pou wouvè zyé anlè chimen ki ta’y é fè chwa woulé pou’y o ba’y do. Pawòl lasa ka envité réyalizé jan chak moun asi latè pou désidé ka i vlé pou monn la nou adan’y la é ki pozisyon i ka konswa i pou ni parapòt a sa. Dèyè sa, sa ki ni sé ki plas moun ka chwazi ba libèté a yo menm. Vansé pou lapé é lawmoni o bésé zyé é sizé anlè sa ka fè grandè a lègzistans ? Kwè an lavi é tout dimansyon a’y o pri adan on véglaj ? Fasadé é laréyalité avè pran soufrans ki ni épi’y o chwazi lafasilité ? Mi sé tou sa fraz a’y la ka chayé. É répons nou ka ba yo ka fè listwa a limanité.
Adan tou sa, sa nou pé èspéré sé pi an pi moun ké vwè pòtalans chèché konnèt tini, pran sans a libèté é konprann nou tini adan yo pouvwa pou konstwi nou menm, konstwi sosyété, konstwi monn la nou adan’y la.
Gadé vidéyo la : Nyouz a avril 2025
