Mwen

– « Nou rivé!

Sa ka fè on moman nou ka mété pyé yonn douvan lòt

Ti pa apré ti pa, nou travèsé

Ti bou apré ti bou, nou rivé a bou

Nou rivé!

La David tini on bra malfini, pli piti

Pasé la wa la ja sou

Nou rivé an kaz an mwen

La an ka santi mwen an plas an mwen

Lè tout chalbari a lavi ka déplasé mwen

Sizé, nou rivé! »

 

Mwen menm

– « Nou rivé é sa bèl

Tibou Gwadloup, Latravèsé, tibra David

Nou maché, nou maché

Nou byen maché asi wout a lavi

An ka santi mwen vidé

Paré pou plen »

 

Mwen

– « Sizé pou gadé jan sa bèl!

Sizé pou santi fréchè a on wòch on titak mouyé èvè on fifin fòl

Chofé èvè on solèy ka jwé cho-kaché avè fèy a pyébwa ki pa ka jwé wòl

Lévé tèt a’w pou gadé jan nou piti

Gè’y wotè a yo! Gè’y woté a sa yo ka ban nou

Gadé yo san boujé é vwè ki jan yo ka boujé, yo !

Pa boujé twòp, pa déranjé yo

Yo byen byen a yo

Pran sa yo ka ba’w

Si ou plisé zyé a’w ou ké vwè nanm a yo »

 

Mwen menm

– « Eskizé mwen, an pò’ò pé gadé sa

Ou pa ka tandé mizik la? »

 

Mwen

– « Ki mizik?

Pa kouté doum-doum a mizik a sé moun la ki chayé tout kaz a yo

Alòs kè isidan ja ni tout »

 

Mwen menm

– « Mé non, moustik a malodan

An ka palé dè laritounèl a dlo la

Fòs é dousè an dé pou an dé

Menm dézòd la é anmenmditan chak gout ni son a yo

Way! An la mé an ja anbala

An la mé an ja an dlo la

É woy! An pa vid ankò

An pa vid an kò »

 

Mwen

– « Éhé! Ou ka gadé mwen, an ka gadé’w

Ou ka gadé mwen, an ka gadé’w

Sakré ti manglous tif!

Wop! I chapé!

Mizik an ka tann aprézan sé chan a sé zozyo a

Rivyè la ka fè boula é mi makè la rantré

Répondè réponn »

On ti van ka chwichwité adan zorèy an mwen

« Fout, koté lasa bèl »

 

Mwen menm

– « Zyé an mwen plen lanmou pou tousa bèlté ka èksplozé douvan nou

Kyè an mwen anflé èvè plen fòs

Nanm an mwen chajé

Annou pati avan an pé pa lévé ankò

Rasin an mwen ja ka fè kò avè ta on pyébwa san laj »

 

Mwen

– « Ola nou k’ay ankò? Nou rivé, an di’w! »

 

Kaprès Aw

Latilyé Maké ansanm, òktòb 2021