Marius Numa : penti pou fè douvan

Awtis pent Marius Numa woulé sé dènyé tan lasa pou mété dèwò on èspozisyon non a’y sé Trajectoire. Kon i abityè, i fè koulè palé pou mété douvan vansé a’y an penti é mésaj i ni pou pòté pou fè pa a’y pou vansé a sosyété an nou. Marius Numa ka ban nou dé mo anlè nouvo travay a’y lasa.

 

Ès ou pé èspliké lidé ki fè ou travay asi èspozisyon lasa ?

 

Sa an té vlé sé montré on chimen an fè é jan an vansé grafikman. Vansé lasa fèt avè korèsyon. Pli ou pran laj, pli ou pé vwè, pli ou ka amélyoré’w. Sé kon on transmisyon ou ka fè parapòt a jòdla pou dèmen.

Sé osi pou montré jenn, pas rivé on lè an èsplwaté on konpétans, an èsplwaté on don. Mé dèyè sé travay, sé travay, sé travay. An pa janmé lagé. An toujou kontinyé travay. Ni pòt ki ouvè an kréyasyon é an ka kontinyé travay pou rèstan ouvè.

Ès ni biten osi ou vlé montré an sé penti la parapòt a vou menm é jan ou vansé ?

 

An ni on lidé grafik an tèt an mwen é tout tan an pa té ni sa an travay, an travay, an rètravay. An pé pa di jòdla kè an ni’y. Mé an santi an pwoché tibwen dè sa an vlé, la an té vlé ay é sa ban mwen tibwen fyèwté. É an ka kyenn a kontinyé pou pé konstwi adan sans an mwen. Sé sa ki ka bay fòs.

Ès ou ni mo pou défini lidé grafik la ou ni la ?

 

An pa ni mo èspésyalman. Mwen sé koulè. An ka itilizé akrilik é an té’é anvi fè sé akrilik la sanm konsi sé luil. Pou yo ni on sèwten briyans. Sé a nivo lasa an travay é an ka pansé an touvé.

An ka désiné dépi tou piti alò nivo grafik an pa té ni onlo pwoblèm. Mé sé sé koulè la, an po to ko ka awmonizé kon an té vlé.

Kidonk, jòdijou ou ka vin prézanté on travay pas ou rivé on koté ou té vlé avè penti la menm mé ès ni lidé osi ou vlé mété douvan adan tou sa ?

 

Wi pas dabò-pou-yonn an té prézanté on èspozisyon an té kriyé Stigmates, sa vlé di sé tout soufrans ou rèsanti ou té ni déjà an lanfans a’w. An sosyété an nou, nou ni ti jé nou ka fè mé fò nou sav ba’y kou fwèt, sa ka oubliyé, mé pòté mak, sa ka sonjé. Nou toujou té ka plézanté anlè pétèt on moun tèt a’y gwo, i ni on gwo né, i ni on gran pyé. Pou nou sé té dé ti jé, mé nou pa konnèt pétèt soufrans moun la ki té ka viv sa té ka sipòté. Kon an té prézanté èspozisyon lasa an mé, an té ay osi asi lèsklavaj. A pa pou rantré adan on pléré ki pa’a fin. Sa an té vlé sé di souvan yo ka fè’w mal é la sé té sé kolon la.  É lanné ka pasé, syèk ka pasé é nou vlé fè sanblan oubliyé mé nou pa’a oubliyé. Stigmates té alantou a : ki jan ou dwètèt viv adan on sosyété avè tout mal-être kè ou ni, ki jan ou dwètèt sipòté tou sa é fè avè’y.

Trajectoire sé on jan pou di lajénès lèwvwè ou ni on pwojè, on ni on biten an lèspri a’w pa détouwné’w dè’y. Menm si ou sav lé pòt pé ké ouvè fasilman pas an sosyété lasa nou asé rèd yonn avè lòt. Mé, toujou gadé òbjèktif a’w byen an tèt a’w é avansé avè’y. Sé lidé lasa an éséyé rèprézanté.

Tini adan onlo pòwtrè a timoun é a madanm pas sé osi on pansé pou manman mwen, pou sè an mwen é moun an enmé.

An ni sé sijé lasa an tèt an mwen dépi on bèl moman. Sé sa an chèché fè sòti adan sé tablo la.

Ki jan sa ké pasé pou èspozisyon lasa parapòt a sitiyasyon la alèla ?

Sé lopital Kapèstè ki lansé pwojè lasa. Anfinaldikont, parapòt a sitiyasyon la, i ké privatizé. Sé moun a lopital é moun ki an lopital la ki ké pé vwè’y.  Vèwnisaj la sé lè 20 mé. Mé si apré biten la chanjé, sa pé an prézanté èspozisyon lasa adan on konsèp èspésyal avè dòt aw osi.