Lavi

Lavi…

Dépi prèmyé jou la, i ka lésé mwen èstébékwé

Ki jan i pé fè tou sa? Ki jan i pé èt tou sa? Ki jan?

Lavi…

An ja voyé on bèl kou-d-zyé an laliwondaj an mwen

Sizé asi douvan pòt an mwen, ki moun an ka vwè pasé? Lavi!

Ki jan i pé èt ozabwa kon sa?

Ki jan i pé lésé nou kon bwabwa kèk fwa?

Pran ti ban la sizé, dépi pipirit chanté

Pozé anba mòn la, lè la ka monté

É Mwen ka rété la, anba solèy cho la

Ka gadé Lavi, toujou li

Ka malmenné détwa

Tèwbolizé lèspri a on dòt

Démantibilé zo a on dènyè

Délè tousa pannan-pannan… Pli ou chiré, pli chyen chiré’w!

Lésé mwen menm atè

San menm ban mwen on ti dèkwa

 

Wé ! Lavi, sé ba’w menm an ka palé… Ki jan ou pé fè tou sa?

Ki jan ou pé mové kon sa?

An las… Lannuit ja tonbé, an ja tonbé

Atè la fwèt!

 

Woy Lavi! Way lavi, wabap!

Ki jan ou pé chayé mwen kon sa? Dépozé mwen Lavi!

Toumblak! Chiré!

Way, an alé!

Monté-désann, douvan-dèyè, goch-dwèt

Rimé mwen toubòlman

Lavi, ki jan ou pé fè tou sa?

Lalin voyé on kenbé rèd ban mwen, on limyè, on priyè, on kakwè

É mizik la touné aladousin

Ki jan ou pé vlopé mwen kon sa?

Adoumanman, kè an mwen pa ni p’on plas pou dòt biten ki lakontantman

Manman y ! Lavi, ou sav mwen enmé’w fò? Dépi prèmyé jou la, ou lésé mwen èstébékwé

Bizwen pran souf

Ki jan ou pé èt tou sa?

Jòdila an pé di’w (mé pa répété two fò)

Ou pé mété mwen an tout dékatman a’w

Mwen enmé’w an jan a’w

Jan ou yé

Jiktan an lagé dènyé souf

On dènyé vanté ké voyé’w alé  

Lavi!

 

Kaprès Aw

Latilyé Maké Ansanm, òktòb 2021