Latilyé Maké ansanm, òktòb 2021

Mi sa pou sav asi latilyé la :

– Sé makè Syanséka é wèbzin Sayanns ki ka òwganizé latilyé lasa

– Latilyé la ké konmansé lendi 25 òktòb é i ké bout dimanch 31 òktòb 2021

– Sé on latilyé pou moun a tout laj dépi yo sa maké lang la

– Moun a tout péyi kréyolopal a Lakarayib pé adan latilyé lasa

– Enskripsyon ka fèt anlè paj Jwenn nou a wèbzin Sayanns. Fò voyé on mésaj adan kilès ou ké mété non a’w (o on non-savann si ou pisimé) épi on adrès mél. Pou sijé a mésaj la mété : Latilyé Maké ansanm òktòb 2021

– Enskripsyon ka konmansé vandrèdi 21 òktòb é ka bout lendi 25 òktòb 2021 midi, lè a Gwadloup

– Chak jou adan mél a zòt, zò ké risivwè on mésaj avè on jé pou fè zòt maké

– Jé la la pou ba zòt on ti dirèksyon pou zò suiv mé apré sonjé osi sé on latilyé pou fè zòt plézi kidonk zò ké pé maké agou a zòt adan istil a maké zò pisimé ki sé poézi, ti istwa, slam, rap, …

– Apré zò fin maké tèks a zòt, zò ké pé voyé’y pou on piblikasyon anlè Sayanns. Mé tansyon ! Si on tèks tini dérèspé, jiré, dénigrasyon, mové enfòmasyon adan, i pé ké pibliyé anlè sit la.

– Pou maké la, nou ké gadé byen pou chak tèks byen maké an GEREC-1 o GEREC-2 (pou moun Matinik) kifè ké pé ni korèksyon a grafi la mé sans, istil é lidé a makè la ké rété jan yo yé.

– Tèks a zòt ké ta zòt kidonk zò ké pé woupibliyé yo apré dòt koté si zòt vlé osi

– Anlè Sayanns, anba chak tèks ké tini :

Non a makè la o non-savann a’y

Latilyé Maké ansanm, òktòb 2021

– Siyanka kan menm, zòt tini jis an bout a mwa novanm 2021 pou voyé maké a zòt pou on piblikasyon anlè Sayanns

Si zòt tini dòt kèsyon ankò, voyé yo ban nou anlè paj Jwenn nou a Sayanns é nou ké pran tan réponn zòt. Sonjé mété pou sijé a mésaj la : Latilyé Maké ansanm òktòb 2021.