Latilyé Maké ansanm a mé 2023

Mi sa pou sav asi latilyé la :

– Sé makè Syanséka é wèbzin Sayanns ki ka òwganizé latilyé lasa

– Latilyé la ké konmansé lendi 1 mé é i ké bout mèkrèdi 31 mé 2023

– Sé on latilyé pou moun a tout laj dépi yo sa maké lang la. Tout moun ki ka palé lang Gwadloup pé enskri.

– Enskripsyon ka fèt anlè paj Jwenn nou a wèbzin Sayanns. Fò voyé on mésaj adan kilès ou ké mété non a’w (o on non-savann si ou pisimé) épi on adrès mél. Pou sijé a mésaj la mété : Latilyé Maké ansanm

– Enskripsyon ka konmansé sanmdi 29 avril é ka bout lendi 1 mé a midi (lè a Gwadloup)

– Chak lendi é mèkrèdi a mwa la adan mél a zòt, zò ké risivwè on mésaj avè on jé pou fè zòt maké.

– Jé la la pou ba zòt on ti dirèksyon pou zò suiv mé apré sonjé osi sé on latilyé pou fè zòt plézi kidonk zò ké pé maké agou a zòt adan istil a maké zò pisimé ki sé poézi, ti istwa, slam, rap, …

– Apré zò fin maké tèks a zòt, zò ké pé voyé’y pou on piblikasyon anlè Sayanns. Mé tansyon ! Si on tèks tini dérèspé, jiré, dénigrasyon, mové enfòmasyon adan, i pé ké pibliyé anlè sit la.

– Pou maké la, nou ké gadé byen pou chak tèks byen maké an GEREC-1 kifè ké pé ni korèksyon a grafi la mé sans, istil é lidé a makè la ké rété jan yo yé.

– Tèks a zòt ké ta zòt kidonk zò ké pé woupibliyé yo apré dòt koté si zòt vlé osi

– Anlè Sayanns, anba chak tèks ké tini :

Non a makè la o non-savann a’y

Latilyé Maké ansanm, mé 2023

Si zòt tini dòt kèsyon ankò, voyé yo ban nou anlè paj Jwenn nou a Sayanns é nou ké pran tan réponn zòt. Sonjé mété pou sijé a mésaj la : Latilyé Maké ansanm.