Lakou kajou

Si ni on biten lasyans ja byen mété dèwò sé jan timoun ka aprann pi byen lè sa yo ka montré yo chouké adan sa yo ja konnèt, kidonk adan kilti a yo é lang a yo.

An sans lasa, Lakou kajou ka fè on bèl travay an lang Ayiti avè zouti édikatif yo ka kréyé pou timoun. Matématik, lasyans, mannyè viv, lang, istwa … tou sa adan bèl vidéyo ki tini ti komédi, chanté é désen animé pou timoun aprann a gou a yo. Anlè YouTube kon anlè sit entèwnèt a yo, moun pé vwè é suiv sa yo ka fè.

An vérité, nou tini la on bèl ègzanp a sa nou pé fè pou lang an nou é pou pèwmèt timoun pi alèz pou dékouvè richès a laliwondaj a yo é tout konésans ki pé ni. Sé on modèl diféran téritwa ola yo ka palé kréyòl pé pran pou vansé adan kréyasyon a zouti édikatif davwa tini lang la lékòl sé yonn, mé mété zouti an men a mèt-lékòl pou yo travay sé byen on lòt zafè. É nou pé pa fè san’y !