Kréyòl

Kréyòl?

Kréyòl, ola ou yé?

 

Janvyé nou bouré an lanmè adan on déboulé ki fin an ben démaré

 

Mi Févriyé: an voyé on bèl ti bwat sik sosé dan myèl pou’w. Sé pou ti bouch a’w démaré, pou i pa yenki di pawòl anmè, malélivé. Kréyòl ola ou yé lè moun an mwen pou di mwen pawòl sikré pou dousiné kè an mwen, pawòl difé pou chayé kò an mwen. An té ké tèlman vlé sa! Vin di mwen jan ou té ké pipinyé po an mwen, jan men a’w té ké kon longan lontan… Di mwen, di mwen é ékri osi tanprisouplé.

 

Ou pa ni tan! Ja ni waka an lari la. Mwa-d-mas an kannaval. An pa ka kouté’w ankò! Pawòl, pawòl! Blag a mas! Ou ja pran twòp fé, gòj ka brilé, Vaval osi! Vaval ka kité nou. Vou osi?

 

Awa! Avril: Kréyòl é krab an pak! Tété dwèt, pran tan ansanm-ansanm, dòmi anba tant, fè kannari kontré… Aa ! Ou fò adan sa! Lésé on ti priyédyé karésé nanm a’w tibwen lè ou fin karésé vant a’w.

 

Mé, pa menm bizwen palé, zansèt an nou ja la. An fonnkè, an fondal, an zantray. An goumé, an lyannaj, an sonjé. Yo té pou nou sé!

 

Jwen pou nou jwenn anba pyé-flanbwayan la. Ba’y détwa bas pou mwen fè on chap adan on zayann anbò rivyè.

 

Vakans rivé! Lagé gidon, alawoulib… Sanblé fanmi é palé dè lavi. Kyenbé’w tibwen! : pa di tala i ka vin ka woulé, i pa adan biten a moun la, fo i « lésé sa tonbé », ri tibwen si ou pé pa kenbé mé pa twòp é ba’y on pal, tonnè! Olyé ou fin pa lésé disparèt pran’w é pa touvé pląs an valiz pou chapé on ti tan avè yo.

 

Sèptanm! Kokiyoko a larantré sonné. Bal fini, vyolon an sak… ès an ké aprann ékri tout dékatman a’w? Ès an ké aprann di pawòl séryé avè’w, pawòl a grangrèk? An dèt ké atann mwa pwochen…

 

Òktòb!!!!!!!! Mi on bèl mwa pou an sonjé jan ou bèl, jan ou rich, jan ou ni on pakèt kat a pozé si Tab! On mwa, sa pa ayen mé sa tèlman tout! Fo byen nou koumansé on koté…É ou sav, tout biten ka vin on biten pa rapòt a on biten…

 

Novanm… Limé on chaltouné, swiv on klendenden adan simityè la… awa pa lésé Bazil chayé’w! Janmé!

Bazil o! ou pé vwayajé o!… ò! ò! Lésé nou lyanné nou pou nou téré moun mé pa jan téré lanmou… o pli mové i ké pousé monchè!

 

Désanm: chanté nwèl! Kréyòl la ka bay: mi ta’w mi tan mwen! Mi bèl lannuit… Lanné la bout. Mi bab!

 

Kréyòl ola ou yé?

Ou an zantray an mwen

An pa toujou anvi goumé pou mèt vou douvan

Twòp konba

An vlé ba’w lanmou touttan.

Kontèl lè an ka fè papyé, pou yo pa gadé mwen kon vyé chabin malélivé pas an ka palé èvè’w! Yo ka fè kon si mété’w an bouch an mwen sé pèd valè po chapé an mwen dèt té pran san fè ayen.

 

An vé pa goumé pou sa, an vlé enmé’w sèlman… sèlman, lontan, toultan… An fèt èvè’w, an ké mò èvè’w.

Bèl bo, gwo fòs

 

Kaprès Aw

Latilyé Maké ansanm, òktòb 2021