Kontré épi mo

Dépi détwa kèk jou péyi la té ozabwa. Mé sa i té pli konmik sé gadé ki jan viris a yo la ka fè chimen a’y. I pa té ka rèspèté p’on sans a siwkilasyon. I té k’alé dwèt douvan’y asi moun isi. Si sé on moun lòtbò,  i té ka pati vwè dòwmèz la pou sav si sé on bonmoun ou on movémoun.

Bonmoun la sé on désidè, sé moun a gouvèlman. Movémoun la sé on travayè a yo. An ka lasa yo ka plen tèt a yo é piblisité é jès a lanmou kouyonnè pou yo pé pran vaksen a yo la. É konsa, lè yo ké tèsté yo ké bon é négatif.

Mi bab mi ! Maksim té la ka gadé sa i ka fèt an péyi Gwadloup. I pran tan gadé lanati é rèspiré lòdè a sé flè la. I pa té an konplosité èvè ponmoun. I té byen. Té ni on bèl sòlèy an syèl la. Ti van a lanmè la té k’alé é vin. Anbyans la té an zafè a’y.

Maksim kontré on fanm ki té ka maché piti-piti kon moun i malad. I té ka fè on pa pou manman, on pa pou papa. Maksim di’y bonjou pas i té byen vlé ba’y on pal. Mé ka i té di’y fè sa ? Manmzèl koumansé palé, i rakonté’y on pakèt biten ki pa té vé di ayen. Yo té ja di’y méfyé’y dè tout sé fanm la ki on jan anba-anba.

Maksim pati alakous konsi sé té on dyab ki té ka kouri dèyè do a’y. I pa té gyè ni chans, i tonbé adan on niyaj gnengnen ki té la ka atann kèk moun pasé pa la. Pò Maksim ! Fò té vwè ki jan i té ka goumé èvè sé gnengnen la. Lè i réisi pati, tout kò a’y té ka graté’y. Érèzdibonnè i pa té gè chigna. I pa té pè ayen, sé té kon sa i té yé dépi toupiti gason.

I sizé anba on fwomajé pou didiko é fè lè pasé anlè’y. Té ka fè tèlman bon, Maksim jis fè on ti bobi, on ti chikèt a dòmi. I lévé an plèn fòm. I ranmasé zéfè a’y. I pati, fò i té rivé an bout a chimen la. I pa té savé ola i té k’ay. Sé té konsa pou té trapé bénédisyon a Bondyé pou rèstan a vi a’w.

Yo toujou té di’y fò i té fè vwayaj lasa on vandrèdi. I té an konfyans é anplis, sé té dènyé vandrèdi a mwa i fèt. Maksim té byen kalkilé avan i pati. Ni sa i pa té ka dérivé, disparèt té ka pran yo.

Toupannan i té ka maché i rivé adan on chan zakasya évè bèl zépin. Maksim pran bon pokosyon pou po a’y pa té chiwé.

I maché onlo. I té kontan pas yo té di’y zakasya té ka pòté chans. Lè ou kwazé on pyé zakasya si chimen a’w, konsidéré ou ja ni sa ou ka chèché. Li menm, i pa té savé sa i té’é touvé.

Té ni on mòn douvan’y é lè i rivé an tèt a’y i vwè on vyé madanm adan tout atiray a dòwmèz a’y. I pran ri lè madanm la fè’y sign é montré’y on koté i té bèl toubòlman, té ka fè bon. Lè i vwè bèl ma la, i pa fè ni yonn ni dé, i plonjé adan’y. Dlo la té cho. I té alèz. Lè i sòti an dlo la, madanm la di’y : « Gason an mwen, ou pé alé, ou pé’é janmé trapé p’on kalité viris an vi a’w. Ou iminizé, vou é zanfan a’w é menm tout désandans a’w. »

Maksim té adoumanman.

Sèwvàn

Latilyé Maké ansanm, òktòb 2021