Jaden an nou

Tibou, 29 avril 2022

Doudou,

An ka imajiné lajòl pa fasil

Nou sé dé jenn ki ka ba kò an nou bann, menm si toulalong dézòd té toujou vlé zingé’w

Nou té ka pran gwan pawòl pou nou té pé voyé tou sé vyé mès lasa andèwò a Lanmou an nou.

i antan, i atan, i atan … san konté.

An pati détwa ti jou sèlman pou ay vwè anman ki té malad é jou lasa ou tonbé an grif a Satan : Blo ! Zanmi frè a’w méné’w adan on zatrap é sé vou  ki pri an sa.

Jòdijou an tou sèl an kaz men nou ka rété dé adan Kaz a Lanmou an nou. Pou nou dé é toupiti ka vin, mwen vlé Kaz an nou vin Kaz a Limyè Lanmou.

Ou planté andidan mwen on grèn kay mi é gwandi avan ou sòti Sarail. Mwen, an kay planté tomat pou wouba’w koulè a Lanmou, pwa-tann pou karésé’w èvè dousè, jiwomon pou fè vant an nou vin won kon solèy, on pyé-mango pou nou pé sa pran fréchè toupannan nou ka fè on pijé zyé, on papayé fimèl pou ban mwen fòs atann vou, kann pou sosé bouch é zorèy an mwen pou sonjé jan nou té yé, ziyanm, anbabon, topinanbou, kawòt, pou sonjé sa ki fèmé ka fin pa sòti lè i mi.

Doudou, Jaden a Lanmou an nou ké gwandi titak pa titak jis tan vou osi ou rivé mi.

An la pou véyé é fè gwandi flanm a Limyè an nou ki bigidi alòs, pa pè ! An gaya pou vou, an gaya pou li, an gaya pou mwen : « Fanm tonbé pa jenmen dézèspéré ».

Nati, bonm Miyèl a’w

S_exPӔnsée‾r

Latilyé Maké ansanm, avril 2022