Bòd lanmè pa lwen, Asosiyasyon Bay La Vwa

Dépi bon détwa lanné asosiyasyon Bay La Vwa ka woulé pa asi Mòwtènòl, an vil Lapwent, Gwadloup, pou ba kilti on bèl balan. Sé on mannyè pèwmèt moun sanblé, dékouvè plis asi sa ki ka fè richès a lilèt la é bay pou lajénès touvé dèyè.

Ruddy Chasselas, prézidan a asosiyasyon la, é tout ékip a’y ka woulé avè anpil détèwminasyon an sans lasa. Safè, yo fè chwa kréyé on latilyé pou moun aprann maké lang Gwadloup. É pandan yonndé lanné kon sa, adan bik a asosiyasyon la, moun kontré pou té pran nouvo konésans é osi pou kréyé.

Jòdi, travay lasa fè, asosiyasyon la désidé mété ansanm tèks a plizyè moun ki suiv latilyé la é fè on liv. Non a’y sé : Bòd lanmmè pa lwen. Avè mo mété asi mannyè konswa lavi, makè a chak tèks wouvè pòt ankò plis asi richès a diférans é asi fondè a lang an nou. Nou tini la, an vérité on bèl ègzanp a jan nou chak pé désidé fè pou pòté grenn-sèl an nou pou vansé a lang an nou.

Annou toujou sonjé, lang kon kilti sé rèldo a on pèp é moun a asosiyasyon Bay La Vwa byen konprann réyalité lasa. Nou pé enki di yo on bèl woulo-bravo pou sa !